ktyabrın 21-də prezident İlham Əliyev baş nazirin iki müavininin - Əli Həsənovun və Hacıbala Abutalıbovun vəzifələrindən azad olunmaları barədə sərəncam imzalayıb.

Novruz Məmmədov baş nazir vəzifəsindən azad edildikdən sonra Nazirlər Kabinetində müavin postlarında da əvəzlənmələrin olacağı barədə iddialar var. Bildirilir ki, yeni baş nazir Əli Əsədovun ilk işi müavinlərinin əvəzlənməsi istiqamətində atacağı addımlar ola bilər. Prezident oktyabrın 17-də keçirdiyi iqtisadi müşavirədə mümkün kadr dəyişikliyinin anonsunu vermişdi. Prezident yeni baş nazir Əli Əsədovun qarşısına bir sıra vəzifələr qoyduğunu demişdi. Sitata diqqət edək: “Yeni hökumət qarşısında bir çox vəzifələr qoyulub. Mən Əli Əsədovu bu vəzifəyə təyin edərkən ona bir çox vəzifələr tapşırdım. Onun qarşısına vəzifə qoydum ki, islahatlar aparılmalıdır, o cümlədən kadr islahatları. Müasir dünyagörüşlü, müasir iqtisadiyyatı bilən, savadlı gənc kadrlar işə cəlb edilməlidir. Biz XXI əsrdə yaşayırıq, köhnə təfəkkürlə, köhnə biliklərlə gələcəyə necə gedə bilərik? Nə qədər biz təbii resurslara arxalanaraq, necə deyərlər, belə ətalət yolu ilə gedə bilərik? Düzdür, islahatlar aparılır, dediyim rəqəmlər bunun əyani sübutudur. Hər bir ölkə bu nəticələrlə öyünə bilər. Ancaq biz bilirik ki, ehtiyatlarımız çoxdur. Onu da bilirik ki, əgər hər hansı dövlət və ya özəl quruma təmiz, bilikli və Vətənə bağlı kadr gətirilirsə, biz orada dərhal dəyişiklikləri görürük”.

Qeyd edək ki, Əli Həsənovun ötən ilin aprel ayının 21-də Qaçqınların və Məcburi Köçkünlərin İşləri üzrə Dövlət Komitəsinin sədri vəzifəsindən azad olunduqdan sonra baş nazirin müavini postunda saxlanılması bir qədər təəccüblü görünmüşdü. Çünki baş nazirin üç müavini yaş həddinə görə işdən azad edilmişdi. Amma aydın idi ki, prezident uzun illərdir çox mühüm - qaçqınlar və məcburi köçkünlərlə iş kimi həssas bir postda işləmiş Əli Həsənovu birdəfəlik hökumətdən uzaqlaşdırmaq istəməmişdi. Dövlət başçısının onu işdən getməsi ilə bağlı qəbul etməsi və fəaliyyətinə görə təşəkkür bildirməsi də Ə.Həsənovun uzunmüddətli fəaliyyətinə verilmiş qiymətdir. Baş nazirin müavini kimi Əli Həsənova əsasən, hüquq-mühafizə orqanları ilə iş, meliorasiya sahəsi və s. məsələlərə nəzarət həvalə edilmişdi. O, 21 ildir ki, baş nazirin müavini idi. 71 yaşlı Əli Həsənov bu vəzifəyə 18 noyabr 1998-ci ildə təyin edilmişdi.

Prezidentin qəbulunda olan və işdən getməsi barədə ərizə verən Hacıbala Abutalıbov da uzun illərdir ki, hakimiyyət komandasında təmsil olunurdu. Əvvəl Bakı Şəhər İcra Hakimiyyətinin başçısı olan H.Abutalıbov da ötən il iş yerini Nazirlər Kabinetinə dəyişmişdi. H.Abutalıbovun meriyadan uzaqlaşdırılmasından sonra onun da təqaüd vaxtının çox uzaqda olmadığı aydın idi. H.Abutalıbov da bunun fərqində idi.

Baş nazirin keçmiş müavin Abid Şərifovun nəzarətində olan sahələrə baxan 75 yaşlı Abutalıbovun son aylar demək olar ki, heç bir fəaliyyəti gözə dəymirdi.

Ə.Həsənovun və H.Abutalıbovun məhz prezidentin son müşavirədə islahatlara qarşı olan qüvvələrin mövcudluğu barədə danışandan sonra işdən çıxarılmaları təbi ki, bəzi suallar yaradacaq. Üstəlik, Ə.Həsənovun xeyli tənqidlərə məruz qalan Əhalinin Siyahıyaalınması üzrə komissiyanın rəhbəri olmasını da xatırlatmağın yeri var. Amma bir həqiqət də var ki, media uzun illər bu artıq sabiq hesab olunan məmurlarla bağlı müxtəlif qalmaqallardan, korrupsiya ittihamlarından yazsa da, onların hansısa qruplaşmada hakimiyyətə qarşı çıxa biləcəkləri iddiası yer almayıb. Həm Ə.Həsənov, həm H.Abutalıbov əvvəl mərhum prezident Heydər Əliyevə, sonra isə İlham Əliyevə sadiq olublar. Şübhə yoxdur ki, onlar yaş həddinə görə Nazirlər Kabinetindəki otaqlarını boşaltmalı olublar. Son müşavirədə də prezidentin qeyd etdiyi kimi, yeni baş nazirin üzərinə yeni vəzifələr qoyulub və ona daha çevik komanda lazım olacaq. Baş nazir müavinləri postuna hələ ki, yeni təyinatlar yoxdur. İstisna deyil ki, kadr dəyişiklikləri digər nazirlik və komitələrdə də davam edəcək...
“Yeni Müsavat”